Фотографирање храна одблиску

Кога размислувате за макро фотографирање, храната често може да се изостави од разговорот за да се даде предност на потрадиционални субјекти како инсекти и цвеќиња. Меѓутоа, фотографирањето храна е неверојатно достапно и има голем избор на субјекти што ви се на дофат во вашиот дом. Исто така, не мора да се потпирате на убаво време или да се надевате дека субјектот ќе седи мирно за да добиете одлични резултати.

Но, не е секогаш лесно да добиете нешто што ги воздигнува вашите слики на ново ниво со една снимка од вашиот ручек. Можете да користите макро објектив за нова перспектива во фотографирањето храна и да се доближите многу блиску, создавајќи прекрасни апстрактни фотографии што ќе го фасцинираат гледачот. Можете да пробате техника како спојување фотографии со различен фокус - што е сега полесно од кога било, благодарение на иновативните функции во некои од најновите фотоапарати од Canon, како што е Canon EOS R10.

Го предизвикавме макро фотографот Matt Doogue да проба фотографирање храна. Тој е навикнат на макро фотографирање на терен, а специјалност му се инсекти, растенија и габи, поради што можноста да фотографира субјекти во својата кујна беше возбудливо искуство што му ја смени перспективата за макро фотографирањето.

Овде, тој споделува што открил.

• Барајте текстури, форми, бои и шеми
• Земете го осветлувањето предвид
• Изберете го соодветниот макро објектив
• Пробајте да споите фотографии со различен фокус
• Истражете различни субјекти
• Создајте интересни слики

Секоја храна со интересна текстура, шема, боја или форма е добар субјект за макро фотографии снимени на извонредно мало растојание. „Сѐ што е покриено со шеќер изгледа прекрасно бидејќи шеќерните кристали личат на дијаманти кога ги фотографирате одблиску“, вели Matt. „Многу слатки имаат текстури, форми и испакнатини што добро функционираат, а исто така, слатките често имаат живописни бои - црвена, жолта, розова и зелена.

„Освен тоа, зеленчуците како што е карфиолот, зелката, па дури и кромидот, имаат интересна структура. Колку е поприроден производот, толку е подобра симетријата, а изработените слатки може да произведат подобри апстрактни резултати“.

Matt смета дека осветлувањето игра важна улога во неговото работење со макро, но храната е многу поинаква од неговите вообичаени субјекти. „Не морав да ја дифузирам светлината толку колку што би морал за нешто блескаво, како бубачка“, вели тој.

За овој проект, Matt купи мал и евтин придушен рефлектор за студио, иако вие можете да пробате да направите свој. Исто така, тој употреби LED-светилки за да ги истакне елементите на субјектот.

„Можете да создадете серија во која секоја слика изгледа сосема различно“, додава Matt. „На пример, на сликите од шеќерни цуцли се гледа круг со црна дупка, но ако ги осветлам од различни агли, изгледаат потполно различно, дури и ако го користам истиот фотоапарат и истиот објектив“.

Ако немате достапно осветлување, можете да работите со природна светлина – особено ако можете да фотографирате храна покрај прозорец и да работите со дневна светлина. Рефлектор, дури и домашно направен од кујнска фолија, може да проектира светлина на вашиот субјект.

Иако можете да фотографирате храна со секакви објективи, побарајте објектив со ознака „макро“ за најдобрите резултати со најмногу детали.

Има опции за различни буџети и стилови на фотографирање. Објективот Canon RF 85mm F2 MACRO IS STM е фантастична опција што се одликува со лесна тежина и кратко фокусно растојание. Соодносот на зголемување е 0,5x, но сепак можете да создадете слики со многу детали, како и да се оддалечите малку за да прикажете повеќе контекст, ако сакате. За оние со поголем буџет што сакаат да се приближат што е можно повеќе, RF 100mm F2.8L MACRO IS USM е извонреден избор што нуди зголемување од 1,4x за апстрактни, „вонземски“ слики.

Погледнете ги нашите водичи за најдобрата почетничка опрема за макро фотографирање и најдобрите објективи од Canon за фотографирање храна за повеќе совети. Можете да ја искористите и практичната алатка за пребарување објективи од Canon што ги приспособува препораките врз основа на вашиот фотоапарат, жанрот во кој сакате да фотографирате, како и функциите кои ви се најважни.

Спојување фотографии со различен фокус е техника во која се спојуваат слики снимени со различни фокусни точки. Ова можете да го извршите рачно со помош на алатки како што е алатката за спојување повеќе длабочини на поле во софтверот Digital Photo Professional (DPP) од Canon, но модели како што се Canon EOS R10 и EOS R7 ви овозможуваат да го извршите тоа во фотоапаратот.

„Тоа ќе ми заштеди многу време“, вели Matt. „EOS R10 ми овозможи да спојам 100 фотографии со различен фокус за само една минута, а потоа сликата се обработува во фотоапаратот. Кога порано ја пробував оваа техника, морав да купам нов компјутер од висока класа за да се справам со датотеките и да ги спојам во софтвер за уредување слики. Сега, EOS R10 ги спојува сликите и брзо работи со единечна слика, што навистина ме поттикнува почесто да ја пробувам оваа техника.

„И не само тоа, туку и фотоапаратот ви ги обезбедува поединечните слики. Тоа е одлично ако подоцна решите дека не сакате „целосен спој“ - на пример, ако сакате помек преден план. Пристапот до сите датотеки ви дава слобода и креативност да ги приспособите нештата на начин на којшто сакате“.

Сите фотоапарати со EOS R-систем се одликуваат со опција за издвојување со рачен фокус на екранот, што користи светли бои за да ги означи областите што се во фокус на вашата слика.

Ако сте почетник во фотографирањето храна, забавувањето и работењето на пообмислен начин може да ви изгледа тешко. Но, тоа може да ви даде нова перспектива кон вашиот субјект, што ви дава можност да создадете нови слики и да истражите повнимателна страна на вашето фотографирање.

„Целото искуство ме воодушеви, особено фотографирањето слатки од овошни пастили“, вели Matt. „Се загубив во светот на храната. Сите овие мали нешта што ги земате од супермаркет - ги земате, ги ставате во кошничка, ги јадете; не ги гледате навистина и не ја цените сложеноста и дизајнот, особено на природните производи. Голем дел од уметноста црпи инспирација од природата, а тоа се гледа кога фотографирате одблиску и ги гледате овие прекрасни дизајни и структури создадени од самата природа“.

Создавање апстрактни слики одблиску ви дава супер моќ - можноста да плените и будите интерес со вашите фотографии. Можете да создадете своја игра за „погодување на храната“ со вашите пријатели, семејството или следбениците на социјалните медиуми.

„Ја пратив сликата од овошната пастила [сликата на заглавјето] на двајца геолози“, вели Matt. „Ги замолив да ми кажат кој камен сметаат дека е на сликата. Мислеа дека е розов кварц и други нешта. Дури започна и мала дебата за тоа кој камен е на сликата!

„Кога фотографирав зелка, некој во моето семејство рече дека никогаш повторно не сака да ја јаде поради деталите што ги откри сликата одблиску“.

Исто како и која било друга уметност, фотографирањето има за цел да предизвика емоции кај гледачот, без оглед на тоа дали се работи за изненадување, глад, или, во овој случај, гадење. Ако предизвика силни емоции, тогаш задачата е успешно извршена.

Фотографирањето храна ги отвори очите на Matt кон креативните можности. „Дефинитивно сакам да вклучам повеќе природни елементи и повеќе симетрија на растенијата, лисјата и цвеќињата во моето фотографирање“, вели тој. „Поубаво ќе ги погледнам и печурките и лишаите, како и шемите на дрвјата и кората. Ако можам да направам овошна пастила да личи на уметничко дело од кристали, тогаш сигурен сум дека можам да создадам нешто извонредно и со своите типични субјекти“.

Matt одржува работилници и часови, а соочувањето со овој предизвик му даде нови идеи. „Секогаш советував да се купуваат цвеќиња за вежбање во домашни услови, но отсега ќе препорачувам и храна бидејќи бев вчудовиден од нештата кои ги видов“.

Напишано од Astrid Pitman