Врвни совети за уникатно улично фотографирање

Уличното фотографирање постои од кога фотоапаратите станаа доволно преносливи за да можат лесно да се носат. Тоа е жанр што вклучува голем број стилови, но лабаво се дефинира како неисценирани слики снимени во јавност. Повеќето луѓе мислат на њујоршкиот стил од 1960-тите до 1980-тите кога мислат на типично улично фотографирање - снимки со динамични движења, понекогаш снимени многу блиску до лицата на луѓето. Меѓутоа, исто како и сите други видови на фотографирање, и тоа еволуираше.

Во ера во која сите имаат паметен телефон во џебот, сериозните улични фотографи се истакнуваат по квалитетот на нивните слики снимени со фотоапарат, како и по креативноста. Може да се држат до горенаведениот стил, но уличното фотографирање го прават на нивен начин.

Земете го Andres McNeill за пример. Со седиште во Глазгов, ОК, тој се стекна со значителен број на следбеници на социјалните медиуми поради своите драматични снимки со фокус на архитектурата на шкотскиот град. Andres смета дека зградите се прв приоритет, а потоа луѓето.

Тука ни ги споделува своите совети за фотографирање на улица.

• Набљудувајте го светот
• Најдете стил што ве инспирира
• Прифатете креативни перспективи
• Искористете ги временските услови во ваша полза
• Однесувајте се со почит
• Торба со опрема за улично фотографирање

Кога Andres излегува да фотографира, намерно избегнува премногу да размислува за тоа каде ќе оди, туку одговара на тоа што го гледа. Сепак, има чувство што бара. „Би рекол дека сум малку поинаков од другите улични фотографи бидејќи ја земам урбаната архитектура предвид“, објаснува тој. „Сакам да го покажам размерот. Сакам да прикажам огромна зграда со луѓе во предниот план за да создадам контраст“.

Andres талка додека не пронајде локација за која смета дека ќе создаде моќна композиција, а потоа го подготвува фотоапаратот и чека. „Како заднина, избирам убава зграда, а личноста што минува пред неа е речиси во втор план“, вели тој. Критериумите за идеалниот субјект најчесто се засноваат врз визуелно повторување или случајност - „човек облечен во зелена блуза покрај билборд на кој има човек што е облечен во зелена блуза и слично“.

Кога фотографирате луѓе во некоја сцена, треба да одредите фокусна точка, без разлика дали тоа ќе бидат очите на главниот субјект, лицето на некоја централна личност во толпа луѓе или некој кој брза долж улицата.

Кинематографијата е важна појдовна точка за Andres, кој составува слика „речиси како првичен кадар во филм“.

Нагласува дека нема само едно решение кога станува збор за денешното улично фотографирање. Нештата кои најмногу го привлекуваат вниманието на Andres се формите и шемите на зградите, без оглед на тоа дали се работи за викторијански градби од 19-тиот век, или, пак, бруталистичките структури што повремено се наоѓаат на улиците на Глазгов. Вели дека е „голем љубител на линии што го насочуваат вниманието, каде што линиите на зградата ве водат кон субјектот. Понекогаш, фотографирам зграда од двете страни на кадарот, а во средината има човек или такси што се движи кон мене.

„Можете да ѝ пристапите на задачата на многу начини“, додава Andres. „Стариот начин беше секогаш да се користи објектив од 35 mm, понекогаш да се фотографира од колкот, одблиску, а сега користиме разновидни фокусни должини. Ако се чувствувате поповлечено, можете да користите објектив од 85 mm или 200 mm и да фотографирате од спротивната страна на улицата за да доловите момент што можеби би го пропуштиле со 35 mm“.

За да снимите уникатни слики, обидете се да фотографирате од невообичаен агол или невообичаена перспектива. Едно од омилените нешта на Andres во врска со Глазгов се различните перспективи и слоевите што може да ги воведе во кадарот бидејќи градот е толку ридест. Височината е одлична и за снимање зајдисонца.

Уште една корисна техника е да се бараат одблесоци од прозорци или други сјајни површини. Освен прозорци, можете да експериментирате со вирови и реки за да создадете интересни композиции.

Ако снимате улични фотографии, размислете што е уникатно за вашиот град и искористете го тоа за да ги направите вашите слики интересни и индивидуални.

Иако има прекрасни згради, Глазгов е и еден од највлажните градови во ОК. На Andres не му пречи тоа. Напротив, ја проверува временската прогноза и се надева дека ќе врне. „Семејството и пријателите ме мразат поради тоа“, се шегува.

„Фотоапаратите со EOS R-систем ми овозможуваат да ја видам секоја капка дожд бидејќи резолуцијата е толку висока“, додава тој. „Дождот им дава сосема поинаков изглед на сликите од изгледот што би го добиле при летен ден. Изгледа поамбиентално“. Исто така, чадорите се одличен реквизит.

Препорачливо е да ги проверите законитостите поврзани со улично фотографирање каде што планирате да фотографирате - но, општо, повеќето земји дозволуваат фотографирање на јавни места освен ако не е поинаку наведено. Тоа вклучува фотографирање пешаци на улица и луѓе на јавни места, како што се парковите.

Сепак, фотографирање странци може да биде застрашувачко. „Бидете искрени за тоа што го правите и ослободете ја вашата страст“, советува Andres, кој вообичаено ја снима фотографијата, а потоа, ако е можно, оди да разговара со субјектот и му ја покажува фотографијата на задната страна од неговиот фотоапарат. Можете и да понудите да ги споделите сликите, или на субјектот да му ги дадете деталите за вашите социјални медиуми за да ги видат сликите онлајн.

Повеќето луѓе разбираат, но Andres со задоволство ги брише сликите ако го замолат.

Компактната големина и перформансите при слаба осветленост на фотоапаратите без огледало со EOS R-систем од Canon, почнувајќи од фотоапаратите за целосна слика EOS R8 и EOS R6 Mark II до фотоапаратите со APS-C-сензор EOS R10 и EOS R50, се одличен избор за улично фотографирање.

Andres претежно фотографира при големи брзини на бленда во режим за континуирано секвенцијално фотографирање. „Сакам да ги замрзнам движењата и не сакам да ја испуштам снимката“, објаснува тој.

Традиционално, уличните фотографи користеле објективи од 35 mm или 50 mm, бидејќи тие се најблиску до начинот на којшто човечкото око го гледа светот и обезбедуваат природна перспектива. Canon RF 50mm F1.8 STM и RF 35mm F1.8 MACRO IS STM обезбедуваат прекрасен и рамномерен ефект на дефокусирање, а нивните широки решетки обезбедуваат филмски ефект, изолирајќи го субјектот и одржувајќи ја заднината заматена.

Но, ако заднината ви е исто толку важна како и субјектот, широкоаголен објектив може да е подобра опција. Извонредно компактниот Canon RF 28mm F2.8 STM има и разновидна фокусна должина и брза решетка за експериментирање со заматување на заднината, поради што е идеален објектив за улично фотографирање. Повеќенаменскиот Canon RF 24-105mm F4-7.1 IS STM се одликува со оптичка стабилизација на слика за да го минимизира тресењето на апаратот, а притоа, ви нуди разновидност за да можете да доловите широкоаголни урбани сцени, како и поинтимни улични портрети. „Понекогаш сакам да зумирам и да создадам различни перспективи“, вели Andres.

Снимање со телефото објектив ви овозможува да одржите растојание од субјектот за да не ја нарушите неговата приватност. Canon RF 24-240mm F4-6.3 IS USM е повеќенаменски објектив со зум до 10x, што е идеално ако сакате еден објектив со фокусна должина за секое сценарио

Уличното фотографирање е најдостапниот вид на фотографирање. Не ви треба комплицирана и скапа опрема за да започнете. Не мора да патувате во странство, да се искачувате по планини или да седите со недели во скривалиште додека не видите ретко суштество. Сѐ што ви треба е да си ја земете торбата со опрема, да излезете на улица каде што живеете и да започнете со фотографирање. Тоа е вештина што се подобрува со вежбање. „Додека не ги обучите очите, не сфаќате дека неверојатните моменти се случуваат постојано“, вели Andres. „Потребно е трпение“.

Фасцинантните субјекти ви се на дофат. Излезете, подгответе се и притиснете го копчето за фотографирање.


Напишано од Rachel Segal Hamilton