Совети и трикови за подобрување на вашите фотографии од храна

Фотографирањето храна е неверојатно популарно на социјалните медиуми. Еден поглед на Instagram е доволен да ви открие дека: сакаме да споделуваме слики од храна. Споделувањето слики од храна не е многу далеку од споделувањето на таа храна со други. Тоа создава некакво чувство на заедништво, речиси како да ја јадете храната заедно со некого.

Објавувањето слики од храна на интернет прерасна во тренд во истиот период кога Instagram, платформа за социјални медиуми што се базира на слики, стана многу популарен.

На фотографите кои се заинтересирани да снимаат слики од вкусна храна, ова им претставува предизвик бидејќи има толку многу слики од храна, што е тешко да се истакнат од другите. Yasmin Albatoul, професионална фотографка и инфлуенсерка за фотографирање храна која живее во Алжир, добро е запознаена со овој предизвик. Се соочила и со други предизвици.

„Како жена, во местото каде што живеам, не смеам да патувам сама или да се шетам низ градот и да снимам улични фотографии“ - вели таа. „Кога учев факултет, пријателите секогаш ми велеа: „Од фотографирањето не може да заработуваш пари, тоа е само хоби“. Но јас велев: „Можам. Ќе фотографирам дома““.

На крајот, Yasmin беше во право. Таа сега е професионална фотографка. Нејзините динамички, разнобојни и често нереални фотографии ќе ви го привлечат вниманието - а може и да ви го разбудат апетитот. Нејзиниот уникатен стил и привлечни слики резултирале со многу платени ангажмани за комерцијално фотографирање, а нејзиниот профил на Instagram брои 105 илјади следбеници (и постојано сè зголемува).

Дел од тоа што ги истакнува фотографиите на Yasmin на Instagram е нејзиниот професионален труд. Постои огромна разлика, вели таа, помеѓу фотографирање на вашата храна во ресторан пред да ја изедете и стилизирање на храната за комерцијално фотографирање што се врши со соодветен фотоапарат.

„Луѓето ја фотографираат својата храна во рестораните главно со своите телефони, без претходно планирање или користење дополнителна опрема“ - вели таа. „Ова се спонтани слики што ги споделуваат во своите приказни на социјалните медиуми, но кога зборуваме за професионално или комерцијално фотографирање на храната, тоа е поинаква тема“.

Ако сте заинтересирани да ги подигнете вашите вештини за фотографирање храна на професионално ниво, тогаш, според Yasmin, најважно е да пристапите на задачата со креативност. Еден од важните фактори за Yasmin е обликувањето на кадарот на нејзините слики според боите, како и додавањето движења што го постигнува со комбинација од изненадувачки реквизити - како конец и масло.

„Повеќе не можам да работам без шише со масло и четка бидејќи сакам храната да изгледа многу сјајно“.

Продолжете да читате за да ги дознаете нејзините совети и трикови со кои ќе можете да снимате фотографии од храна на повисоко ниво.

Во поглед на гледањето на боите, видот на луѓето е подобар од повеќето животни. Научниците главно се согласуваат дека: една од причините зошто гледаме во боја е поради тоа што на нашите предци им било практично да го пронајдат овошјето и да утврдат колку е зрело.

„Боите ги избирам според општата атмосфера на ресторанот или храната и опкружувањето од каде што потекнува. На пример, користам заднина во сина боја за морска храна, бидејќи таа боја дискретно укажува на нејзиното потекло“.

Логично е боите да бидат главен фактор во фотографирањето храна. Боите го привлекуваат нашето внимание. Избирањето соодветни бои што си одговараат меѓусебно може да „внесе енергија“ во целата композиција и да изгледа светло и живописно.

„Сината боја изгледа одлично наспроти портокаловата боја на ракчињата, на пример. Изборот на елементите во секоја фотографија, вклучувајќи ја и бојата на заднината, се избираат според главниот субјект“.

Како фотограф за храна, треба да доловите повеќе отколку само храната. Садовите и приборот за јадење се два примери за придружни елементи на храната. Но, не е пожелно да ја фотографирате храната во чинија што се користи секојдневно. Таа треба да ја разубави целата композиција. Друго правило што треба да го следите е да најдете сад со малку поголеми димензии од просечните за да можете лесно да изложите многу храна.

„Кога јадеме, храната најчесто ја сервираме на бела и обична чинија. Затоа е многу важно да избереме садови и прибор за јадење што изгледаат луксузно, за храната да изгледа поубаво“.

Кога размислувате за реквизити за стилизирање на фотографиите од храна, треба да земете предвид повеќе фактори освен бојата. Треба да ги земете предвид материјалот и целосната естетика на предметот. Дрвените лажици, на пример, изгледаат поприродно од металните и не рефлектираат светлина, поради што се претпочитана опција за многу слики.

Храната секако може да ја изложите на чинија, но постојат и други опции. Парчињата мермер може да внесат тежина, величественост и софистицираност. (Тие се одлични за фотографирање и смрзната храна како сладолед, бидејќи помагаат во ладењето на храната.) Исто така, држачите за торти нудат одличен начин за прегледно распоредување на храната.

Другите реквизити, како што се свежите тревки, укажуваат на свежина и вкус, а внесуваат и нова димензија во боите и текстурата. Зачините и трошките може да ја збогатат сликата со уште повеќе вкусови. Не заборавајте ни на чаршафите за маса и другите кујнски предмети што можат да ја збогатат сликата со боја по ваша желба.

Во секој жанр на фотографирањето има одредени вештини што може да ги стекнете само со искуство. Затоа, со цел да ги откриеме професионалните тајни, ја прашавме Yasmin како ја распоредува и стилизира храната.

„Една од најважните работи во фотографирањето храна е користење некакви трикови за да ја направите храната да изгледа повкусна и подолготрајна“ - вели Yasmin.

Некои од овие трикови што ја прават храната да изгледа повкусна, нема да ви звучат вкусно - на пример, сипување моторно масло врз палачинките.

„Може да користиме течност за миење садови што ќе предизвикува пена кај кафето сè додека ни е потребно. Месото го премачкуваме со масло за да изгледа сјајно и вкусно. Исто така, шлагот го заменуваме со пена за туширање бидејќи трае подолго и врз неа не влијае топлината што ја генерира осветлувањето“.

Воглавно, храната не се движи. Поради тоа, храната во уметничките слики најчесто се доловува како „мртва природа“. Но, модерното фотографирање може да внесе повеќе реалистичност во сликите отколку што сликарите како Monet би можеле да си замислат.

„Движењето во сликите ни раскажува интересна приказна. Кога ќе видите слика со статична композиција, таа може да изгледа здодевно. Ништо не се случува. Подоцна може и да заборавите на сликата. Но, внесувањето движење во сликата ќе ја направи уникатна и незаборавна“.

Кога ги гледате сликите од храна на Yasmin, од кои многу изгледаат како да се доловени во движење, може да видите колку привлечно изгледаат динамичките фотографии од храна. Во поголемиот дел од нејзините дела, храната изгледа како да се составува, со крајното посолување доловено во воздух. Во други случаи, Yasmin создава слики што изгледаат како храната да се дели на состојките од кои е направена, како што е прикажано погоре.

Yasmin вели дека користи тенки дрвени стапчиња и лепило за да позиционира мали парчиња храна, со цел да создаде илузија на движење во фотографијата. Потоа вешто ги отстранува стапчињата користејќи софтвер за уредување. Може да користите и конец доколку сакате да позиционирате нешто во воздух.

„Елементите во сликата, на пример, колачиња или торта, може да се прицврстат со тенки дрвени стапчиња“ - вели Yasmin.

Ваквите трикови се практични за фотографирање динамички движења, како пржење вечера во вок тава. И не заборавајте: движењата може да бидат присутни во многу форми, почнувајќи од кашкавал што се лепи на чинијата додека извлекувате парче пица од неа, па сè до пареа што нежно излегува од шолја со кафе.

Голем тренд за професионалните фотографи на социјалните мрежи е „споредба на подготовката на сликата и конечната слика“. Ваквите подвижни слики или видеозаписи ги откриваат процесот на снимање прекрасни фотографии и трудот што се вложува за секоја композиција.

Овие содржини ги инспирираат другите фотографи, бидејќи ги откриваат без малку волшебните процеси што се одвиваат пред да се активира блендата на фотоапаратот.

Запомнете: споделувањето фотографии од храна може да нè поврзе. Храната нè асоцира на меѓусебно поврзување и ова е една од причините поради која фотографирањето храна стана толку популарно. Со споделување слики од вашата храна, приватната вечера може да се трансформира во заедничко задоволство.

Една студија покажа дека снимањето слики од храна може да има позитивен ефект и врз вкусот. Научниците замолија една група луѓе кои ручаат да снимат слика од нивната храна пред да ја изедат. Друга група луѓе ја изедоа истата храна без да ја фотографираат. Првата група што ја фотографираше својата храна, изјави дека била повкусна.

Фотографирањето храна е нешто што треба да се цени, бидејќи ни помага да се обединиме. И, можеби најважно од сè, ја прави храната повкусна.

За да дознаете повеќе за начинот на кој Yasmin снима прекрасни слики од храна, погледнете ја нејзината опрема за фотографирање храна.*


* Достапно само на одредени јазици.